காலம் செதுக்கும் ரசனை!

ஒரு தலைமுறையின் ரசனை (Taste and Sensibilities) என்பது தற்செயலாக, தன்னியல்பில் உருவாகும் ஒன்றல்ல. அது அந்தத் தலைமுறை வளரும் சூழல், தொழில்நுட்பம், அரசியல் மற்றும் சமூக மாற்றங்களின் கூட்டு விளைவாகும். அவ்வப்போதைய வாழ்வியலே அந்தத் தலைமுறையின் கலை, இசை மற்றும் ரசனையைத் தீர்மானிக்கிறது. ரசனையைப் பெருமளவு பாதிக்கும் முக்கிய காரணிகள் சிலவற்றைச் சிந்திக்கலாம்.

தொழில்நுட்ப வசதிகள் (Technological Amenities)

ரசனையைத் தீர்மானிப்பதில் தொழில்நுட்பத்திற்கு ஒரு முக்கிய இடமுண்டு. 90-களில் வளர்ந்தவர்களுக்கு ஒரு பாடலைக் கேட்க வேண்டுமென்றால், ஓர் ஆடியோ கேசட் பிளேயர் தேவை. பின்னர் ஒரு படத்தின் பாடல் 'கேசட்'டுகளை வாங்கிவரவேண்டும். பல்வேறு படங்களிலிருந்தும் குறிப்பிட்ட பாடல்களை இணைத்துக்கொடுக்க, ஊருக்கு ஊர் பதிவுக்கூடங்கள் எல்லாமிருந்தன. போலவே படம் பார்க்க வேண்டுமென்றால் திரையரங்குக்குத்தான் சென்றாக வேண்டும். அல்லது டிவியில் போடப்படும் படங்கள். அடுத்தக் கட்டத்துக்குச் சென்றால் விடியோ பிளேயர்ஸ் மற்றும் கேசட்டுகள். அப்படியும் நாம் பார்க்க விரும்பும் படங்களைப் பார்க்க முடியுமா என்பது சந்தேகமே! ஆனால், இன்றைய தலைமுறைக்கு இணைய ஸ்ட்ரீமிங் வசதி (Spotify, Netflix) இருப்பதால், உலகின் எந்த நாட்டின் படங்களையும், பல்துறையைச் சேர்ந்த ஆவணப்படங்களையும் எந்நேரமும் பார்க்க முடியும். அனைத்தும் நம் விரல்நுனியில் இருக்கின்றன. இதனால், இன்றைய இளைஞர்கள் பொறுமை குறைந்து, எல்லாவற்றிலும் அவசரமும், வேகமும் கொண்டவர்களாக மாறியிருக்கிறார்கள். சொந்த மண்ணின், பண்பாட்டின் இசை மட்டுமல்லாது, உலகளாவிய கலைகளை, கொரியப் படங்களை, தென்னமெரிக்க இசையை அனுபவிக்கும் வாய்ப்புகள் அமைவதால், இதைத்தான் உய்த்தாக வேண்டும் என்ற எந்தத் தளைகளும் இனியில்லை. அதனால், விதம் விதமான ரசனைகொண்டோர், ஃப்யூஷன் கலைஞர்கள் உருவெடுப்பார்கள்.

சமூக-அரசியல் சூழல் (Socio-Political Context)

ஒரு தலைமுறை வளரும்போது அந்த நாட்டில் அல்லது உலகில் நடக்கும் முக்கிய சம்பவங்கள் அவர்களின் ரசனையில் ஆழமான தாக்கத்தை ஏற்படுத்துகின்றன. 1991-ல் இந்தியாவில் ஏற்பட்ட தாராளமயமாக்கலுக்குப் பிறகு வளர்ந்த தலைமுறையின் ரசனை, அதற்கு முந்தைய தலைமுறையை விட உலகளாவியதாக (Globalized) மாறியது. ஒரு காலக்கட்டத்தில் நடக்கும் சமூகச் சிக்கல்கள், போராட்டங்கள் அந்தத் தலைமுறைக்கு புரட்சிகரமான இசையையும், தீவிரமான இலக்கியங்களையும் ரசிக்கக் கற்றுக்கொடுக்கின்றன. இலங்கையில் இனத்துக்காக நடந்த போராட்டங்கள் அம்மக்களிடையே விடுதலையை, வலியைப் பேசும் படைப்புகளை உருவாக்கின. அதுவே எந்தச் சிரமங்களும் இல்லாத, வாய்ப்பு வசதிகள் நிறைந்த சூழலில் வளரும் தலைமுறையினர் பொருளற்ற கேளிக்கைகளை மட்டுமே ரசிக்கும் நிலைக்குச் சென்றுவிடுகிறார்கள்.

கலக மனநிலை (Rebellion)

ஒவ்வொரு தலைமுறையையும், அதன் முந்தைய தலைமுறையின் ரசனை பாதிக்கத்தான் செய்கிறது. சிறுவயதில் வீட்டில் கேட்ட இசை அல்லது பார்த்த படங்கள் ஒரு அடிப்படை ரசனையை நமக்குள் முதலில் உருவாக்குகின்றன. பின்னர், ’எங்கள் அப்பா காலத்து ரசனை பழையது’ என்று கருதும் இளைஞர்கள், ஒரு புதிய கலை வடிவத்தைக் கையிலெடுக்கிறார்கள். இதுவே புதிய ரசனைகள் உருவாகக் காரணமாகிறது. 'ராக்' அல்லது 'ராப்' இசையின் வளர்ச்சி இப்படியானதுதான்.

பாப் கலாச்சாரம் மற்றும் சினிமா (Pop Culture & Cinema)

சினிமா மற்றும் இசை நாயகர்கள் ஒரு தலைமுறையின் 'ஸ்டைல் ஐகான்களாக' (Style Icons) மாறுகிறார்கள். ஒரு குறிப்பிட்ட காலத்தில் வரும் ஒரு 'மெகா ஹிட்' திரைப்படம் அந்தத் தலைமுறையின் நடை, உடை, பேச்சு வழக்கு, மற்றும் காதல் சார்ந்த பார்வையையே தீர்மானிக்கவல்லதாக அமைந்துவிடுகிறது. பூவே பூச்சூடவா எனும் திரைப்படம், தமிழக இளம்பெண்களின் ஆடை மற்றும் அணிகலன்கள் மீதான பெரும் தாக்கத்தையே ஏற்படுத்தியது. இளையராஜாவின் இசை ஒரு தலைமுறைக்குத் தனிமையைக் கொண்டாடுவதற்குச் சொல்லிக்கொடுத்தது என்றால், ஏ.ஆர். ரஹ்மானின் இசை மற்றொரு தலைமுறைக்கு துள்ளலை அறிமுகப்படுத்தியது.

சுருக்கமாகச் சொன்னால், ரசனை என்பது ஒரு தொடர் ஓட்டம். ஒரு தலைமுறை எதைப் பற்றாக்குறையாக உணர்கிறதோ, அதை அடுத்த தலைமுறை தனது ரசனையின் மூலம் தேடிக்கொள்கிறது. காலம், கருவி, மற்றும் காட்சி ஆகிய மூன்றும்தான் ஒரு தலைமுறையின் ரசனையைச் செதுக்கும் உளிகளாக இருக்கின்றன.